काठमाडौँ । पूर्व सभामुख तथा प्रतिनिधि सभा सदस्य कृष्णबहादुर महराकी जीवनसंगीनी सीता महराको कोरोना संक्रमण देखिएपछि उपचारका क्रममा निधन भएको छ ।
सभामुख महराका पूर्व प्रेस सल्लाहकार डिल्ली मल्लका अनुसार गएको दसैँमा पुर्ख्यौली घर रोल्पा मेबाङ गएको बेला स्वास्थ्यमा सामान्य समस्या देखिएपछि उहाँलाई कार्तिक १३ गते दाङस्थित गोर्खा अस्पतालमा भर्ना गरिएको थियो।
निमोनिया र स्वासप्रश्वासको समस्या देखिएपछि कार्तिक १४ गते शुक्रबार हेलिकोप्टरबाट काठमाडौं ल्याई नर्भिक अस्पतालमा भर्ना गरिएको थियो।
नर्भिकमा पीसीआर जाँच गर्दा कोरोना पोजेटिभ अर्थात सङ्क्रमण देखिएको थियो।
१५ गतेदेखि भेन्टिलेटरमा राखेर उपचार गर्ने क्रममै आज बुधबार बिहान ६स्२५ बजे निधन भएको अस्पतालले पुष्टि गरेको छ। सीता महरा माइस्थेनिया नामक रोगबाट विगत १० वर्षदेखि पीडित हुनुहुन्थ्यो।
सीता महरा वि।सं। २०१८ साउन १३ गते शुक्रबार बुवा मुक्तबहादुर थापा र आमा खिर्मादेवी थापाको कोखबाट रोल्पाको गजुल धौलेगाउँमा पहिलो सन्तानको रुपमा जन्मिनुभएको थियो।
कृष्णबहादुर महरासँगै २०३५ सालमा विवाह भएको थियो। उहाँका दुई छोरा र दुई छोरी रहेका छन्। महरा भूमिगत भएपछि तत्कालीन राज्यले धेरैपटक शारिरीक मानसिक यातना दिनुका साथै केही दिन हिरासतमा पनि लिएको थियो।
२०५४ साउन २९ गते राती रोल्पा मेबाङस्थित घरमै आएर नाबालक छोराछोरीलाई घरमा थुनेर गिरप्तार गर्न थालेपछि उनी प्रहरीको घेरा तोड्न सफल हुनुभएको थियो। त्यसपछि घरभित्र थुनिएका छोराछोरी पनि घरपछाडिको ढोकाबाट भागेर बाँचेका थिए। त्यहीँ दिनदेखि घर छोडेका महरा परिवार नै पूर्णकालीन कार्यकर्ताको रुपमा जनयुद्धमा सहभागी भएका थिए।
सामान्य लेखपढ मात्रै गर्न जानेकी सीता महरा तत्कालीन माओवादीको ठूलो जिम्मेवारीमा नरहे पनि कृष्णबहादुर महरालाई नजिकबाट पारिवारिक तथा पार्टी राजनीतिमा पनि सहयोग गर्नुभएको थियो।
प्रधानमन्त्री ओलीद्वारा श्रद्धाञ्जली ब्यक्त !
प्रतिनिधिसभा सदस्य एवं पूर्व सभामुख कृष्णबहादुर महराकी श्रीमती सिता महराको निधन प्रति प्रधानमन्त्री केपी शर्मा ओलीले श्रद्धाञ्जली ब्यक्त गरेका छन ।
प्रधानमन्त्री ओलीले ट्विट गर्दै भनेका छन, “प्रतिनिधिसभाका सदस्य एवं पूर्वसभामुख माननीय श्री कृष्णबहादुर महराकी श्रीमती सीता महराको आज बिहान नर्भिक अस्पतालमा भएको निधनबाट अत्यन्त दुस्ख लागेको छ। म दिवंगत सीता महराप्रति भावपूर्ण श्रद्धाञ्जलि अर्पण गर्दै पूर्वसभामुख महराजी सहित शोकाकुल परिवारजनमा गहिरो समवेदना व्यक्त गर्दछु।”
पूर्वसभामुख पत्नि सिता महराको काठमाडौंको नर्भिक अस्पतालमा उपचारका क्रममा आज विहान ६ः२५ बजे निधन भएको थियो ।
कोरोना पोजटिभ देखिएपछि उनलाई गत शनिबारदेखि भेन्टिलेटरमा राखेर उपचार शुरु गरिएको थियो ।
