काठमाडौं । भोलि हुने काँग्रेस संसदीय दलको नेताको निर्वाचनका लागि आज मनोनयन दर्ता हुँदैछ ।
संस्थापन पक्षबाट पार्टी सभापति तथा प्रधानमन्त्री शेरबहादुर देउवा एक्लो उम्मेदवार भए पनि इतर समूहले दलको नेताको उम्मेदवार टुङ्ग्याउन सकेको छैन । नेता शेखर कोइराला र महामन्त्री गगन थापाको दलको नेतामा इतर समूहबाट दाबी छ ।
दुवै नेताबीच रातभरिदेखि आज बिहानसम्ममा सहमति भएपछि मनोनयन दर्ता गरिने एक नेताले जानकारी दिए । उपसभापति धनराज गुरुङले सहमति गराउन आफूले प्रयास गरे पनि दुवै नेता अडानबाट पछि नहट्दा समस्या भएको बताउनुभयो ।
आज फेरि छलफल गरेर एक जना उम्मेदवार तय गरिने उहाँले जानकारी दिए । संस्थापन समूहबाट आकांक्षी देखिएका नेता रामचन्द्र पौडेल, डा. शशाङ्क कोइराला र प्रकाशमान सिंहले दावी छोडेपछि भने देउवालाई सजिलो भएको छ ।
सहमतिको ‘अन्तिम’ कसरतमा शेखर-गगन समूह
कांग्रेस संसदीय दलको नेता छान्ने निर्वाचनका लागि आज मनोनयन दर्ताको समय तोकिएको छ । दिउँसो २ बजेदेखि सुरू हुने मनोनयनको समयअघि नै शीर्ष नेतृत्वबीच सहमतिको प्रयास भइरहेको छ ।
संस्थापन पक्ष सभापति एवं प्रधानमन्त्री शेरबहादुर देउवालाई नै सर्वसम्मत बनाउन प्रयासमा छ । तर, देउवाविरुद्ध उम्मेदवार खडा गर्न इतर समूहमा दौडधुप जारी छ ।
संस्थापन इतरबाट शेखर कोइराला र गगन थापा दुवैले दाबी गरिरहेकाले एकजनामात्र उभ्याउने गरी नेताहरू सहमतिको प्रयासमा छन् ।
सोमबार अपराह्न छलफलमा जुटेपनि दुवै नेताले अडान नछाडेपछि आज बिहान शेखर९गगन समूहका नेताहरुको बैठक होटल एम्बास्डरमा जारी छ ।
निर्वाचनको अघिदेखि नै गगन थापाले संसदीय दलको नेता लड्न तयारी थालिसकेको बताएका थिए । सुरूमा केही संकेत नगरेका शेखरलाई नजिक रहेका सांसदले अहिले गगनलाई अघि बढाउन नहुने भन्दै गगनभन्दा आफूहरूसँग सांसद बढी भएकोले गगनलाई नछाड्न दबाब दिएको बताइएको छ ।
‘सिनियारिटीको हिसाबले पनि शेखर दाइको लागि सबै साथीहरूलाई सहमत गराउन लागिरहेका छौँ । प्रयास जारी छ । निष्कर्ष आइसकेको छैन’, इतर समूहका एक नेताले भने ।
यता अर्का महामन्त्री विश्वप्रकाश शर्माको समर्थन पाएका गगन पनि पछि हट्ने मनस्थितिमा छैनन् । उनले छलफलमा आफू एक्लै भएपनि लड्ने बताएका छन् ।
गठबन्धनबाट ९१ सीट उम्मेदवारी दिएको कांग्रेसले ५७ सीट जितेको छ । समानुपातिकसहित प्रतिनिधिसभामा कांग्रेसको ८९ सीट छ । देउवाले टिकट वितरणमै संस्थापनइतर समूह आफूमाथि हाबी हुन नसक्ने गरी सन्तुलन मिलाएका छन् । १४औँ महाधिवेशनपछि संस्थापनइतर पक्ष तितरबितर भएपछि देउवालाई पार्टीभित्र ‘कम्फरटेबल’ भएको छ ।
